Confessions we adopt

PAGPAHAYAG SA PAGTOO SA BEREA BAPTIST

Pasiuna-
Kining nga Pagpahayag sa Pagtuloan sa Berea Baptist nga gigahinan ug panahon sa pag-hubad gikan sa English nga sinultihan sa Berea Baptist Confession nga gipahayag usab sa Berea Baptist Church sa Mantachie, Mississippi USA, ug nga diin gikopya usab gikan sa New Hampshire Confession, nga subay usab sa mga karaanang mga amahan sa pagtoo. Gidungagan usab kini uban sa mga pagtuloan sa Bibliya nga gibarugan niining maong iglesia.
Amoa kini nga gimantala aron mahimo nga giya sa mga kaubanan sa pagtoo kung unsa ang mga mahinungdanon nga mga pagtuloan sa Bibliya. Aron duna kami hiniusa nga pagbarug ug kahibalo sa Pulong sa Dios (1Cor. 1:10). Ug alang usab sa among mga magsusupak ug tig-akusar nga diin lahi mga pagsabut kanamo ug sa among mga pagtuloan.
Dungag usab kining pagpahayag dili mahimo nga hinungdan sa pagpasagad sa dili na pagtoon sa Kasulatan, kundili kini gimugna nga minugbo lamang gayud, sa tuyo sa pag-awhag pa gayud sa usa ka tigbasa ug magtutudlo sa pagkugi ug pagtoon sa Balaan nga Kasulatan. Mahimo unta kining panalangin sa matag-usa nga magabasa.

Artikulo sa mga Gituohan
Tungod sa daghanan nga mga nagkalain-lain rehilyosong pundok karon nga nagasulti sa Bibliya isip mao ilang giya ug sumbanan sama kanamo, apan lahi kanamo sa Pagtuloan, Pagtoo, ug Pagkinabuhi, among gibati ang pagka-kinahanglanon sa pagbutang ug linain nga pagpahayag mahitungod sa among gitoohan nga diin subay sa mga baruganan sa among mga karaang mga amahan sa pagtoo; dili ingon nga hulip sa Balaan nga Kasulatan, apan ingon nga paghan-ay kung unsa ang mga mahinungdanon ug haligi nga mga Pagtulon-an sa Pulong sa Dios.

MGA HALIGING PAGTULON-AN SA BEREA BAPTIST

1-ANG MATUOD NGA DIOS
Kami nagatoo nga duna lamang usa ka Dios, ug nag-inusarang Buhi ug Matuod nga Dios (Duet.6:4; Isa. 43:10-11), walay kinutuban (Sal.139:7-12; 147:5); Maalamon (Buh. 15:18), Magbubuot (Sal. 115:3) Espiritu (Juan 4:24), Kang kinsang ngalan mao si Yehovah (Sal 83:18), nga Magbubuhat (Gen. 1:1) ug Labawng magmamando sa Langit ug sa yuta Dan. 4:35); 1Cron. 29:11-12), sa dili malitok nga himaya nganha sa Pagka-balaan( Ex. 15:11: Isa.6:3; 1Ped. 1:15-16; Pin.4:6-8), ug takus sa tanang pasidungog, pagsalig, ug gugma (Matt.10:37; Mark. 12:30; Pin. 4:11), nga diha sa pagkahiusa sa pagka-Dios adunay tutolo ka Balaan nga Persona, ang Amahan, Anak, ug ang Espiritu Santo (Matt.28:19; Juan 15:26; 1Cor.12:4-6; 2Cor.13:14; 1Juan 5:7[kjv]),managsama nganha sa tanang Balaanon nga pagkahingpit (Juan 5:17; 10:30; 14:23; 17:5; Buh.5:3-4; 1Cor.2:10-11; Phil.2:5-6), ug adunay nagkadaiyang pagmugna apan nagka-uyon sa pagpamuhat sa dakung trabaho sa kaluwasan (Efe.2:18; 2Cor.13:14; 1Ped. 1:2; Pin.1:4-5).

2-ANG GINOONG JESUS-CRISTO
Kami nagatoo nga ang Ginoong Jesu-Cristo maoy usa ka matuod nga Dios nga nagalungtad bisan wala pa siya nagpakatao (Miqueas 5:5; Juan 1:1-2,14; 8:58:17:5,24; Col.1:15-17; Heb.10:5; 1Juan 1:1; Pin. 1:8,17-18; 22:13; Prov.8:22-30), nga diin dunay duha ka kinaiyahan si Jesus Cristo; ang iyang matuod nga PagkaDios ingon nga Bugtong Anak sa Dios ug ang iyang pagkamatuod nga tao ingon nga Siya NAGPAKATAO sa tawhanong inahan apan walay tawhanong amahan, nganha sa samang persona nga mao si Jesu-Cristo (Mat.1:18-23; Luc. 1:30-35; Juan 1:18; Fil. 2:6-8). Ang kahimtang sa pagkaDios gihuptan gayud ni Jesu-Cristo tungod kay Siya gitawag nga; Dios (Tit.2:13; Rom.9:5; 1Juan 5:20; Isa. 9:6; Heb. 1:8-9; Mateo 1:23; Juan 10:30; Fil. 2:5-6); Magbubuhat (Juan 1:1-3; Col. 1:15-16; Prov. 8:30); Eternal o walay katapusan (Isa.9:6; Miq. 5:2; 1Ped. 5:10; Juan 17:5; Efe. 3:21); Soberenti o Magbubuot (Pin. 19:11-16; Marc. 4:37-41; 1: 27; Mateo 21:19); Makagagahum sa Tanan [Ominpotent] (Juan 3:13,31; Pin. 1:8,17-18, Isa. 9:6; Fil. 3:21 ; Heb.1:3; Mateo 28:18); Anaa sa tanang dapit [Omnipresent] (Mateo 18:20; 28:20; Pin. 2:1); Nahibalo sa tanan [Omniscient] (Juan 2:24-25; 6:30; 21:17; Pin. 2:23); walay Pagka-usab (Heb.1:10-12; 13:8); ingon nga Persona nga pagasimbahon (Heb.1:6; Mateo 28:16-17- walay lain kinahanglan pagasimbahon kundili Dios lamang- Jer. 17:5; Pin. 22:9; Buhat 10:25-26; Roma 1:25); Ug ingon nga persona nga diin ang mga pag-ampo kaniya ipahinungod ug pangayoon (Juan 14:14; 16:23-24). Ang pagkasayup sa pagtoo sa pagkaDios ug pagkatao ni Cristo maoy pagsimba ug pagtoo sa bakak ug dili matuod nga Jesu-Cristo sa kasulatan. Ug dungag pa ang Cristo nga nagpanuktok sa kasing-kasing, naghulat, naghangyu ug nangayo ug pagtugot sa tao aron musulod sa kasing-kasing, maoy mini ug dili matuod nga Cristo sa Bibliya ug ubos sa kabubut-on ug pagtugot sa tao.

3-ANG BALAAN NGA ESPIRITU
Kami nagatoo nga ang Balaan nga Espiritu maoy usa ka balaan nga persona ug dili ingon nga hinungaw, implowensya, kusog, o gahum (Juan 14:16; 16:13); tupong sa Dios Amahan ug Dios Anak ug ingon nga sama nila ug kahupnganan o esensya ug kinaiyahan (2 Corinto 13:14); nga Siya naglihok diha sa kabuhatan (Genesis 1:2); ug nagpugong sa dautan hangtud nga mamatuman ang katuyuaan sa Dios (2 Tesalonica 2:7), ug tig-paila sa sala (Buhat 2:37); nga Siya mao ang nagtrabaho sa espirituhanong pagkahimugso pag-usab (Juan 3:6; Tit.3:5); nga Siya musulod nganha sa kasing-kasing diha pagkabuhi pag-usab ug diha Siya mupuyo sa dayun ingon nga patinga sa sulod sa kasing-kasing (John 14:16; Efeso 1:13), ingon nga saksi sa atong pagka-inanak sa Dios (Roma 8:16), ingon nga magtutudlo (Juan 16:13), ug nagbalaan sa magtotoo (1 Corinto 6:11). Siya dili sama sa butang o hiyas nga pangayuon ingon nga Balaan nga Espiritu kundili hinoon ingon nga magtugyan ngadto Kaniya isip magtatabang sa pag-ampo (Roma 8:26), ug ingon nga napuno sa Iyang paggiya (1Tesalonica 5:19; Efeso 5:18).

4-ANG PAGKA-MAGBUBUOT (Sovereignty) SA DIOS
Kami nagatoo nga ang Dios maoy usa ka labaw nga Magbubuot (1Cron.29:10-12; Job 23:13; Sal. 103:19; 115:3; 119:91; Isa.46:9-11; Roma 11:33-36), nga nagakaluoy kang bisan kinsa nga Iyang pagakaluy-an ug nagapatig-a kang bisan kinsa nga Iyang pagapatig-ahon ( Ex.3:19; Roma 9:14-24), nagabuhat sumala sa Iyang kabubut-on nganha sa mga panon sa kalangitan ug nganha sa tanang pumoluyo sa yuta (Dan. 4:35), nagapalihok sa tanang butang sumala sa tuyo sa Iyang kabubut-on (Efe. 1:11) diin kini naglakip bisan pa sa matag tuyo ug lakang sa tao (Jer. 10:23; Prov. 16:9) , tinubdan sa tanang maayo ug kaalam; ug balaanong nagatugot sa tanang kadautan/katalagman (Isa.45:7), nga magakahitabo sa rason nga Siya lamang ang nasayud sa Iyang kaugalingon (Deut. 29:29) ug nagamando alang sa Iyang kaugalingon nga himaya (Roma 11:3-36; Prob.16:4) ug kaayuhan alang sa tanang Niyang linuwas (Roma 8:28).

5-ANG KABUBUT-ON (Will) SA DIOS
Kami nagatoo nga ang kabubut-on sa Dios kini naglangkob sa Tinago ug Gipadayag nga Kabubut-On (Deuteronomio 29:29); Una-Ang Tinago Nga Kabubut-On apan nabahin usab kini sa duruha nga mao ang 1.) Tinubdan nga kabubut-on sa Dios(Causative Will); nga nagpasabut nga ang Dios maoy naghimo o nagtrabaho sa tanang positibo o maayong butang nga nahitabo ug nanungha nga mao ang; Kabuhatan (Genesis.1:31), ang Kaluwasan (Salmo 3:8,74:12,Jonas 2:9) ug mga espirituhanong gasa (Juan 3;27,Santiago 1:18,Filipos 2:13). Ug ang 2.) Gikatugot nga kabubut-on(Permissive will) nga diin ang Dios nagtugot sa kadautan nga mahitabo ingon nga kini lakip sa Iyang Tinago Katuyoan; sama pagkahagbong sa sala ni Adam ug ang kamatayon sa Iyang Bugtong Anak, (1Pedro 1:18-20; Roma 5:12,15-19; 2Timoteo 1:9); Ang matuod nga Dios sa Bibliya maoy Dios nga nasayud sa tanan nga nagpasundayag sa katapusan gikan sa sinugdan ug mga butang nga wala mutungha,(Isaias 46:9- 10,Job23:13-14).ug nagalakip sa tanang butang sa kinatibuk-an, kini mamatuman gayud ug dili mababagan, mapugngan, mapakyas, o malangay sa binsa kinsang tao, yawa,o kang bisan kinsang gahum (Job 23:13; 42:1-2, Salmo 115:3; 135:6-13; Proverbio 19:21; Ecclesiastes 3:14-15; Isaias 14:24,27; 46:9-10; Jeremias 10:23; Lamentaciones 3:37; Daniel 4:17,35; Mateo 6:10; Buhat 21;14; Roma 9:19; 11:33-36; Efeso 1:11). Ikaduha-Ang Gipadayag nga Kabubut-on sa Dios mao ang mga butang nga gipahibalo sa tao ug gipadayag sa Dios, ug mao kana ang nagpaila sa atong presente nga mga Obligasyon o responsibilidad, nga mao ang Iyang mga; sugo ug Iyang kasugoan nga gipadayag diha sa tanlag sa tao pinaagi sa Balaan nga kasulatan (Roma 2:14-16; Santiago 4:12;Salmo 19:7-9;Isaias 34:16; 2Timoteo 3:16 ikompara 1Juan 3:4). Ang pagkasayud sa matarung apan wala gibuhat maoy sala (Juan 9:41; Santiago4:17).Ug kining Kabubut-ona kinahanglan buhaton ug sundon sa tao, hinungdan nga kining maoy sukdanan sa atong responsibilidad o obligasyon ngadto sa Dios, ug kini nga kabubut-on sa Dios maoy mapakyas, mababagan, masupak, mabatukan, matuis, mausab, malapas, sa tao tungod kay kita nga mga tao maoy mohimo niini subay sa gitudlo ug gipadayag sa Dios kanato pinaagi sa Iyang pulong (Juan 12:47-48), mao kana ang ginapasabut niining mga musunod nga texto: Buhat 7:51; ikompara Nehemias 9:29-30; Mateo 5:48; 7:21; 19:26; Marcus 3:35; Juan 7:16-17; Roma 12:1-2; 1Juan 2:1.

6-ANG BALAAN NGA KASULATAN
Kami nagatoo sa balaanon nga pagtuga sa kan-oman ug unom ka mga kasulatan sa DAAN ug BAG-O nga Testamento (2Tim.3:15-17), ug nagadawat kanila isip gasa nga nagpadayag sa hunahuna ug kabubut-on sa Dios (Deut 4:2; Sal. 19:7; Prov.30:5-6; 2Ped. 1:19-21; Pin. 22:18-19); kami nagatoo nga diha sa Bibliya gipadayag ang tanang doktrina ug kamatuoran nga among gibutang niining maong pagbutyag karon sa among pagtoo.
Kami nagatoo nga ang tanang Kasulatan diha sa orihinal nga sinulat maoy hatag nga pulong nga gituga sa Dios; nga kining pagtuga nahimo sa usa ka makatingalahanon pinaagi sa kaalam ug kagahum sa Dios, ug dili kini ikatandi sa pagtuga nga ginahimo sa mga tao gumikan sa kaalamon ug yutan-on nga mga pagtuon; gani dili sa paagi isip sa pagsalikway sa kahimuan sa tao, nga diin atong makita ang pagpadayag sa mga personal nga kalainan sa kinaiya, estilo, ug pinulongan; nga dili ingon nga mga managlahi nga bahin, apan managsama ug husto sa matag bahin sa Bibliya diha sa pagka-uyunay sa kasaysayan, balaod, panultihon, mga panagna, o doktrinal, kalakip silang tanang pulong nga makaplagan sa orihinal nga mga sinulat; nga kining pagtuga naglukop kasaysayan ug syensya nga basihan kutob sa pagkalakip sa pagtulon-an, aron nga ang Bibliya dinha sa orihinal nga sinulat wala gayuy sayup o sipyat sa kinatibuk-an; kini gimugna sa Dios( 1Thess. 2:13), kaluwasan ang katuyoan (2Tim.3:15; Buh.11:14; Roma 1:16; 10:8-10; Juan 5:38-39; 1Ped.1:10-12), ug kamatuoran nga walay sagul nga sayup nga bahin( Prob.30:5-6); Juan 17:17; Rom.3:4); nga nagpadayag sa kamatuoran nga ang Dios magahukom kanato(Juan 12:47-48; Rom. 2;12; Sant.2:12) ug busa kini ug hangtud sa katapusan sa kalibutan magpabilin, ang tinuod nga tumong sa Cristohanon nga panaghiusa(1Cor.1:10; Efe.4:3-6; Fil.2:1-2; 3:16; 1Ped. 4:11), ug ang labaw pasikaranan nganha ang tanang tawhanong pamatasan, doktrina, ug opinyon, kinahanglan diha masulayan (Buh.17:11; 2Cor.13:5; 2Thess.5:21; 1Juan 4:1; Isa 8:20).
Kami usab nagatoo nga ang Dios nagtipig sa Iyang Pulong dinha sa orihinal nga Hebreohanon (Masoretic Text) ug ang orihinal nga Grego (Textus Receptus), ug ang pagka maminatud-on nga paghubad niining mga orihinal nga mga pinulongan (Sal.119:160; Matt. 24:35); busa among gitoohan nga ang King James Version, nga gihubad gikan niining mga tekstoha, nga mao ang among angay nga ginagamit nga hubad sa Bibliya sa among katiguman. Ang uban nga hubad tingali ginabasa ug ginatun-an, apan kami nag-amping nianang mga bag-ong hubad sa Bibliya nga mga dili matinud-anon sa paghubad gikan sa Hebreohanon ug Grego nga mga kasulatan ug mga supak sa pagka-Dios ni Cristo ug daghan pa nga mga kamatuoran. Ang libro nga gitawag Apochrypha, bisan orihinal kining gipatik sa King James Version sa 1611, dili kana lakip sa mga canon(saktong lagda) sa mga Kasulatan, ug busa walay otoridad sa mga kaiglesiahan sa Ginoo, kondili kana lamang maoy mga sinulat sa mga tao nga walay lamdag gikan sa Dios.

7-ANG PAGBUHAT SA TIBUOK KABUHATAN / UNIBERSO
Kami nagatoo nga ang panghitabo sa Genesis mahitungod sa pagpamuhat sa Dios kinahanglan dawaton ingon nga matuod ug dili ingon nga hulad o pasumbingay; nga ang Dios nagbuhat sa tao sama sa Iyang kaugalingong hulagway nganha sa pagkabalaan(Gen. 1:26-27; 2:7; Colosas 3:10), dili sa paagi sa proseso nga ebolusyon gikan sa ubos matang nga mananap; nga ang tanang kahayupan ug tanaman maoy sama gihapon nga gibuhat direkta sa Dios (Gen.1:20-25; Juan 1:1-3; Col. 1:16; Rom. 1:18-20) ug gibutang ilalum sa dili ma-usab nga katuyoan nga silang tanan managpamunga ug managhan sumala sa ilang managlahi nga matang (Gen. 1:21-24).

8-ANG PERSONALIDAD NI SATANAS
Kami nagatoo nga ang Yawa o si Satanas maoy persona nga dautan nga espiritu(1Cor.2:12; Efe.2:2; 2 Tes.2:9-10)), nga kanhi usa ka balaan nga manulonda (Ezeq.28:11-19), gikan sa maong kahimtang nahulog sa pagpakasala (1Tim.3;6), nga nagdala sa daghang panon sa mga manulonda isip ilang pangulo (Job 4:18; Matt. 25:41; Pin. 12:3-9), ingon nga prinsipe sa kagamhanan sa kangitngit niining kalibutana (Juan 12:31; 14:30; 16:11), nga siya maoy usa ka kabatok sa Dios (Zech. 3:1-2; Matt. 13:39), ang maninintal (Gen. 3:1-6; Matt. 4;3), ug magsusumbong sa mga balaan (Job 2:1-7; Pin. 12:10), ang nagdala sa gahum sa kamatayon (Heb. 2:14-15), ingon nga gikatugot sa Dios, magmumugna sa tanang kadautan ug sa mga bakak ug sayup nga mga relihiyon (Juan 8:44; 2Cor. 11:13-15; 4:34), ang labaw nga kagahum luyo sa presente nga pagbiya sa kamatuoran (2Tes. 2:7; 1Tim. 4:1); ug nga siya gikatagana nang daan ngadto sa katapusan nga pagkapukan ug walay katapusang pagkalaglag ngadto sa linaw nga nagdilaab nga kalayo (Pin.20:10).

9-ANG PAGKAHULOG UG PAGKADAUTAN SA TAO
Kami nagatoo nga ang tao sa sinugdan gibuhat sa Dios nga matarung (Eccl.7:29) ug may kinutuban nga kahingpit (Gen. 1:27-31),ug tungod sa kinaugalingon nga kagustohan sa pagpakasala siya nahulog gikan sa iyang balaanon nga kalipay (Gen.3:6-24) tungod sa pagka-masinupakon ang hukom nga gisangputan niya mao ang espirituhanon nga kamatayon(Gen. 2:16-17; Rom. 5:12); ug siya sa kinatibuk-an nawad-an sa espiritohanon nga pagkinabuhi, nahimong patay sa mga kalapasan ug mga kasal-anan ug nahimong sumosunod sa kagahum sa Yawa tungod kay hamolag kini sa pagkabalaan sa Dios (Isaias 59:2) ; ug ang sala nga nahimo ni Adam gibutang usab ngadto sa tanang niyang mga kaliwatan (Rom. 5:18-19; 1Cor.15:22), ug nga ang makasasala ug dautan nga pagka-tao napasa ngadto sa tanan niyang kaanakan (Gen. 8:21; Job 14:4; Sal. 51:5; 58:3; Isa. 48:8); ug tungod niana ang matag-kaliwatan ni Adam sa pagkatao mga anak nga gikaligutgutan sa Dios (Efe.2:1-3), tibuok nakabsan sa espiritohanon nga kinabuhi (Juan 5:24; Col.2:13), kasupak sa Dios (Rom.8:7), sa kinatibuk-an nga pagka-tao dautan (Job 15:16; Jer. 4:22; 13:23; 17:9) way mahimong kusog (Rom. 5:6) o paglaum (Efe. 2:12) gawas lamang kon luwason ni Cristo ( Mat. 1:21) ug buhion pag-usab sa Balaan nga Espiritu (Juan 3:3,5; 6:63; 2Cor. 3:6), dungag pa ang tao walay katakus ug dili gayud muduol kang Cristo gawas kung kini danihon sa Dios (Jeremias 31:3 Juan 6:44,65).

10-ANG KABUBUT-ON SA TAO
Kami nagatoo nga ang tao sukad sa pag-umol niini diha sa kahimtang nga hingpit ug pagka-enosenti sa sala; gihatagan sa Dios ug kabubut-on nga may kagawasan ug kagahum sa paghimo sa gusto niini diin walay pagpugos sa pagbuhat mahitungod sa maayo o dautan (Matthew 17:12; James 1:14; Deuteronomy 30:19), apan kining maong kabubut-on may kinutuban ug mausabon (Eccl. 7:29; Gen.3:6); tapos sa pagka-hagbong sa sala ni Adam kini nakabsan na sa espirituhanong himaya sa Dios(Roma 3:23; 5:12) ug wala na ing abilidad nga mangita sa Dios (Salmo 14:2-3; Roma 3:10-11 ikompara Genesis 3:7-10); ug ang kabubut-on nga nahuptan sa tao karon dili na kini gawasnon sa pagpamuhat ngadto sa mga espirituhanon mga butang sa Dios kundili kini naulipon na sa sala (Juan 8:34; Roma 6:16; 8:7-8); nahimong gawasnon ang tao sa pagbuot sa mga butang yutan-on o lawasnon na lamang apan sa espirituhanon wala na kini kagawasan ug kagahum kon gitawag freewill (1Corinto 2:14; Juan 6:44,65); mao nga ang espirituhanong kaluwasan imposible na kining mahimo sa tao pinaagi sa iyang tawhanong pagbuot kay kini nagkinahanglan na ug kagahum sa Dios aron ang tao mahigawas sa pagkaulipon sa sala (Isaias 64:6; Mateo 19:26; ikompara- Jeremias 24:7; Juan 1:12-13; 3:3; 8:36; Roma 9:16; Efeso 2:1-5,8-9; Colosas 1:13; Salmo 80:18-19); tapos ang tao gipahigawas na sa Dios gikan pagkaulipon sa sala nga kini siya anaa na sa kahimtang sa grasya nga nakabaton sa espirituhanon kaluwasan bisan tuod anaa pa siya sa makasasala nga lawas (Roma 8:10,14-16,33; 1Juan 5:13) nga diin ang Espiritu sa Dios mao na ang magmando sa tao aron makigbatok kini sa unodnong kagustohan sa pagpakasala ingon nga ulipon na sa pagkamatarung pinaagi kang Cristo (Galacia 5:16; Roma 6:17-18, 20-22; Filipos 2:13).

11-ANG MGA ASPETO NGA NAGALANGKOB SA TIBUOK PAGKATAO
Kami nagatoo nga ang tao sa iyang tibuok nga kinaiyahan nga pagkatao gilangkuban kini sa tutulo ka aspeto (TRIPARTITE); ang espiritu, kalag ug lawas (1Tesalonica 5:23); nga ang ESPIRITU lahi kini sa kalag (Hebrohanon 4:12) ug wala usab ing lawas ug bukog (Lucas 24:39), nga kini nahimong patay o nahimulag sa pagkabalaan sa Dios sa diha nga nakalapas si Adam (Genesis 2:16-17; Mateo 22:8; Isaias 59:2) ug kinahanglan nga buhion o igaanak pag-usab sa Balaang Espiritu ang espiritu sa tao aron kini maka-alagad sa Dios sa espirituhanong paagi (1Corinto 2:14 ikompara Salmo 80:18-19; Juan 3:3; Efeso 2:1), nga gitawag usab kini nga espirituhanon nga pagkabanhaw (Salmo 80:18-19). Ang KALAG dili mao o usa ra sa lawas (1Hari 17:21-22; Mateo 10:28; Lucas 12:4) apan diha sa kalag gipahimutang ang panimuot-(Roma 2:15) pagbati-(Job 14:22; Salmo 42:4-6), kahibalo-(Salmo. 13:2; Proverbio. 2:10; 19:2,8; Lamentaciones. 3:20) ug kabubut-on-(Deuteronomio 11:13; Mateo 22:37) maoy hinungdan nga gitawag kini nga “kalag nga may kinabuhi” o sa hebreo chay nephesh kon kalag nga nagalihok (Genesis 2:7), nga diin kini dili gayud mapatay sa tao (Mateo 10:28; Lucas 12:20), sa kinitibuk-an mao ang pagkapersona sa tao diha sulod sa lawas (Galacia 2:20; Filipos 1:23), ug diha nahimutang ang sala (Miqueas 6:7; Habacuc 2:10), ug kini mao ang nagkinahanglan sa kaluwasan (Hebreohanon 10:39; Santiago 1:21; 1Pedro 1:9), nga diin ang kalag sa mga linuwas human sa kamatayon kini uban ni Cristo (Filipos 1:23; Pinadayag 6:9-11; 20:4) ug ang mga kalag sa mga wala maluwas maoy pagka-anaa sa kapildihan (Marcus 8:36) ug pagkalaglag (Mateo 10:28); Ug ang LAWAS maoy unodnon nga bahin sa tao nga giulmol sa Dios gikan sa abug ug mubalik sa abog (Genesis 2:7; 3:19), ug diin nganha gipahimutang ang espiritu ug kalag, nga ang pagkahimulag sa lawas gikan sa espiritu ug kalag maoy muresulta sa kamatayon sa lawas (Genesis 35:18; 1Hari 17:21-22 ikompara Santiago 2:26), nga diin ang lawas sa mga linuwas pagabanhawon kini uban sa Dios sa pagkinabuhi nga walay katapusan ug ang mga sinalikway mabanhaw usab ngadto sa pagkahinukman sa silot sa walay katapusan (Mateo 25:46; Juan 2:29).

12-ANG DAYON O ETERNAL NGA KATUYO-AN SA DIOS
Kami nagatoo nga ang pagpamili maoy dayon o eternal nga katuyoan sa Dios ngadto sa kaluwasan (Efe. 1:4), personal (Deut. 7:6; Juan 15:16; Buhat 9:15), ug walay kondisyon (2Tim. 1:9) nga katuyo-an sa Dios, sumala sa kang kinsa Siya sa Iyang grasya nga pagbuhi pag-usab, pagbalaan, ug pagluwas sa mga makasasala (Roma11:5-6; Efeso 1:3-14; 1Juan 4:19; 1Pedro 1:1-2); ingon nga kini uyon sa responsibilidad sa tao, nga kini naglakip sa tanang mga pamaagi tukma sa gilaraw Niyang daan (Buhat 13:48; Roma 8:28-31; 2Tesalonica 2:13-14; Santiago 1:17-18); ug nga maoy pagpakita sa mahimayaon , matarung, magbubuot nga Dios ingon walay kinutuban nga kagawasanon, kaalam, kabalaan, ug walay pagka-usab (Exodus 33:18-19; Jeremias 31:3; Mateo 20:15; Roma 9:22-24; 11:32-36; Efeso 1:11); nga wala gayud maglakip sa pagpagarbo (Efeso 2:8-9) ug nagatudlo sa pagpa-ubos, paghigugma, pag-ampo, pagdayeg, pagsalig ngadto sa Dios, ug madasigon nga pagsunod sa Iyang pagkamaluluy-on (1Corinto 1:26-31; 4:7; 1Pedro 2:9); ingon nga nagadasig sa pagamit sa kinalabwan nga mga pamaagi sa pagmantala (1Corinto 9:22; 2Timoteo 2:10); nga kini makita pinaagi sa mga epekto ngadto sa tanang matuod nga mitoo sa Maayong Balita (1Tesalonica 1:4-10; Roma 1:16); ingon nga patukoranan sa kasigurohan sa usa ka Kristohanon (Isaias 42:16; Roma 8:28-31; 11:29); ug aron sutaon nato ang atong kaugalingon, diha tumang pagkamakugihon pag-amping niini ingon nga pilini sa Dios (Filipos 3:12; Hebrohanon 6:11; 2Pedro 1:10-11)

13-ANG DALAN SA KALUWASAN
Kami nagatoo nga si Jesu-Cristo gisamkon pinaagi sa Balaan nga Espiritu (Lucas 1:35) diha sa milagroso nga pamaagi, natawo diha sa ulay nga si Maria (Isaias 7:14; Mateo 1:18-25), diin walay tawhanon nga amahan (Galacia 4:4); nga diin Siya pinaagi sa gimbut-an nga daan sa Amahan sa kinabubut-on mikuha alang sa Iyang kaugalingon sa atong kinaiyahan nga tawhanon, apan walay sala (Hebreohanon 2:14; 4:15; 7:26; 10:5; 1Pedro 2:22), mituman sa kasugoan sa Dios pinaagi sa hingpit nga pagsunod (Isaias 42:21; Mateo 5:17; Roma 3:21; Galacia 4:4-5), ug pinaagi sa Iyang mahulipon nga kamatayon naghimo ug tibuok nga paglukat alang sa tanang nga kalapasan sa tanang mga pinili (Mateo 20:28 Juan 10:11,15 ; Isaias 53:1-12; Roma 4:25; 1Corinto 15:1-3; Hebreohanon 9:12-14, 26; 1Pedro 3:18); nga diin ingon nga gibanhaw sa kamayon Siya karon anaa sa mahimayaong trono diha toong kamot sa Dios Amahan didto sa langit (Hebreohanon 1:8; Colosas 3:1-4; Roma 8:34; 1Pedro 3:22); ug nahiusa diha sa Iyang kahibulongan Personalidad ang mahigugmaon pakigsandurot uban sa diosnong kaputli, Siya sa tanang paagi takus ug angayan, maluloy-on, ug usa ka hustong Manluluwas( Salmo 89:19; Colosas 2:9; Hebreohanon 2:18; 7:25-26; 9:24-28); ug ang tanang panalangin nga pagadawaton pinaagi lamang sa pagtoo (Roma 3:20-28) diha sa naula nga dugo ni Cristo (Roma 3:24-25) ug nga walay paghinulsol, walay pagtolon-an, walay pagbati, walay pagbulut-an, walay tinud-anay nga paningkamot, walay pagpailalum sa kamanduan ug kabalaoran sa bisan unsa nga iglesia, walay bautismo, ni walay bisan unsang butang nga bisan sa diyutay nga paagi ikadungag sa bili sa hamiling dugo nga giula sa among Ginoong Jesu-Cristo alang sa kaluwasan sa iyang katawhan nga pinili (Titu 3:5; Mateo 1:21; Pinadayag 5:9).

14-ANG GRASYA SA ESPIRITUHANONG PAGBUHI PAG-USAB
Kami nagatoo nga aron mamaluwas, ang makasasala gikinahanglan gayud nga buhion pag-usab, o igaanak pag-usab( Juan 3:3,6-7; 1Corinto 2:14; 2Corinto 5:17; Titu 3:5); nga ang pagbuhi pag-usab naglangkob kana sa paghatag ug balaan nga kahusay diha sa hunahuna (Deuteronomio 30:6; Jeremias 24:7; Ezequiel 36:26; Galacia 5:6; 1Juan 4:7); nga kini moepekto sa pamaagi nga dili matudkad sa tawhanong pagpanabut pinaagi sa kagahum sa Balaan nga Espiritu, subay sa balaang kamatuoran (Salmo 119:50; Proverbio 1:23; Juan 17:20; 1Corinto 4:15; Santiago 1:16; 1Pedro 1:23-25), aron masiguro ang atong bulontaryo nga pagsunod sa Maayong Balita (Salmo 110:3; Juan 6:44-45, 65; 2Corinto 10:5; Efeso 1:17-20; 1Pedro 1:22-25); ug ang hustong ebidensya niana makita diha sa balaang bunga sa paghinulsol (Buhat 5:31; 2Timoteo 2:24-25), Pagtoo (Juan 6:29; Buhat 18:27; Filipos 1:29; Colosas 2:12; 1Pedro 1:21), ug kabag-ohan sa kinabuhi (Roma 6:4; 1Corinto 6:9-11; 1Pedro 4:1-4).

15-ANG PAGTAWAG SA DIOS
Kami nagatoo sa pagtawag sa Dios ngadto sa kaluwasan nga diin gilangkuban kini sa duruha ka matang sa Pagtawag; Una ang pagtawag alang sa tanang mga tao (General Call o pag awhag) sa paghinulsol ug pagtoo sa Maayong Balita (Marcus 1:15; Buhat 19:30), ug kining maong pagtawag maoy paagi sa Dios pinaagi sa mga espirituhanon nga pagwali ug pagbasa sa pulong sa Dios pinaagi usab sa mga espirituhanong mga tao nga mga minanduan sa Espiritu sa Dios, ug kining maong pagtawag maoy madumilian, matuis, masupak, ug mababagan sa tao tungod kay kini trabaho man lamang sa tao sa pagwali ug dili maoy direktang pagtrabaho sa Dios nganha sa kasing-kasing (Buhat 7:51-52 ikompara Nehemias 9:30, Mateo 13:13; Juan 8:45,47). Ang Ikaduhang pagtawag maoy pagtawag usab sa Dios pinaagi sa pagwali sa mga espirituhanong mga tao nga mga minanduan sa Espiritu sa Dios ug kini inubanan sa pagtrabaho sa Dios sa kasing-kasing sa tao (Effectual Call o Irrisitible Grace o malampuson nga pagkabig) (Roma 10:17 ikompara Buhat 16:14; Jer. 24:7; Ezequel 36:26-27), ug kining maong pagtawag moepekto lamang ngadto sa mga tao nga gipili ug gitagana sa Dios ngadto sa kaluwasan (Juan 10:26-17; Buhat 13:48; Roma 8:29-30; 1Corinto 1:26-28; 1Tesalonica 1:4-6; 2Tesalonica 2:13-14; 1Pedro 1:9) ug kini nga pagtawag dili mabatukan, mausab, matuis, mababagan, madumilian, ug masupak sa tao tungod kay kini pinaagi man sa kagahum sa Espiritu sa Dios(Efeso 1:18-19; 3:7,16-21; 1Tesalonica 1:5; 2Timoteo 1:9) sama sa pagtawag sa Dios kang Apostol Pablo (Buhat 9:1-16; Galacia 1:15).

16-ANG PANALANGIN SA KALUWASAN
Kami nagatoo sa panalangin nga gibubo ni Cristo ngadto kanila nga nagatoo Kaniya mao ang kaluwasan; nga kini naglakip sa tanang balaanong mga buhat sa Dios sa Iyang paglukat ngadto sa tanang mga pinili, lakip diha ang malampusong pagtawag, mao kana ang balaanong trabaho sa Dios nga malampuson ug dili dumilian nga pagtawag sa pinili ngadto sa pagkabaton ug kaluwasan nga gipalit ni Cristo ngadto kanila pinaagi sa Iyang paglukat (Juan 6:37; 10:26-28); pagkamatarung, nga mao kana ang Balaanong buhat sa Dios nga diin maoy pagpalit pinaagi sa pag-ula ug dugo ni Cristo (Roma 5:9), ug pinaagi sa Iyang Kagahum, duna nay kagawasan ang usa ka magtotoo gikan gahum ug pagkaulipon sa sala (Roma 3:24; 4:25; 5:1; 8:30; Buhat 13:39; Titu 3:7); Grasya, ang Balaanon nga katungod sa Dios diin Siya magaluwas, dili tungod sa bisan unsang kaugalingon nga binuhatan sa tao (Efeso 2:5, 9-10), apan ang tanan lonlon trabaho ug buhat lamang ni Cristo (Juan 3:16; 1Pedro 2:24; Pinadayag 7:13-15); pagpataliwala, ang Balaanon nga buhat sa Dios diha sa paghalad ni Cristo pinaagi sa Iyang Kamatayon ingon nga hulip sa mga makasasala (Isaias 53:4-6; 11-12); pagpahinungod, ang Balaanong buhat sa Dios nga diin Iyang gipahinungod o giisip ang pagkamatarung ug pagkahalangdon ni Cristo diha sa magtotoo (Roma 4:1-13; 2 Corinto 5:21; Galacia 3:13; 1Juan 3:5); pagpasaylo, ang Balaanong buhat sa Dios nga diin Iyang gipasaylo ang kasal-anan sa usa ka magtotoo (Jeremias 31:34; Lucas 24:47; Buhat 13:38; Efeso 1:7; Colosas 2:13; Titu 2:14);pagbalaan, ang Balaanong buhat sa Dios nga diin Iyang gibutang ang Iyang pagkabalaan diha sa kinasul-oran nga bahin sa tao (Efeso 4:24; 2Pedro 1:4; 1Juan3:7), o ang bag-ong pagka-tao, ug paggahin sa tibuok pagkatao ngadto sa pag-alagad sa Dios (Roma 6:1-23; 2Corinto 7:1; 1Tesalonica 4:3-4; 5:22; 2Timoteo 2:19-22); paghimaya, ang Balaanong buhat sa Dios nga diin ang lawasnong bahin sa tao nga madunoton paga-ilisdan na ngadto kahimtang nga walay pagkadunot (Roma 8:11; 1Corinto 15:35-57; Filipos 3:20-21; Colosas 3:4; 1Juan 3:1-2).

17-ANG PAAGI SA PAGSIMBA DIHA SA PANAGKATIGUM
Kami nagatoo nga ang paagi sa pagsimba nga ginapangita sa Dios, kini pinaagi diha sa Espiritu ug Kamatuoran (Juan 4:23-24); nga ang pagsimba pinasikad sa Espiritu maoy pagsimba ug paghimaya nga angay sa ngalan sa Dios(Salmo 29:2; Buhat 12:21-23),ug nga kini wala magkinahanglan ug makita nga mga simbolo o larawan (Exodus 20:4-5; Salmo 115:4-8; Isaias 45:5-7; 1Juan 5:21) tungod kay kana maoy pagpaila sa pagkawalay pagtoo ngadto sa Dios nga Espirituhanon nga presente nga nakakita ug nakadungog sa tanan (Hebreohanon 4:13; 11:1,6; Jeremias 23:23-24), ug nga ang espirituhanon nga pagsimba maoy panagkatigum nga ligdong o solemno (Joel 1:14; Habacuc 2:20; Sofonias 1: 7-9) ug dili pinaagi pasundayag sa mga sayaw nga sama sa gihimo ni David nga diin dili pagsimba apan pagdula lamang ( (2 Samuel 6:14-21), ug inubanan sa mga pag-awit nga tukma sa Bibliya ug dinuyogan sa ligdong nga mga tulunggon nga mga kinuldasan o de kwerdas (Salmo 92:3; Isaias 38:20) diin tukma sa pagsimba didto sa langit nga mga dunay tulunggon sama sa Alpa (Pinadayag 5:8); ug wala usab kana nagpasabut nga mugamit na ug insenso ang pagsimba dinhi sa yuta tungod kay ang atong pag-ampo mao na ang insenso nga kahumot sa panimhot sa Dios (Pinadayag 5:8). Ug dungag pa ang pagsimba diha sa Kamatuoran maoy pagsimba sa Dios lamang ug wala nay lain nga alagaron (Mateo 4:10; Pinadayag 22:8-9; Colosas 3:5), ug kini gikinahanglan gayud subay sa mga pagtulon-an ni Jesu-Cristo (Mateo 28:20; 2 Juan 9) nga iyang gibilin sa Iyang iglesia nga diin nganha lamang Siya nagadawat ug pasidungog ug himaya (Efeso 3:21; 1Timoteo 3:15); ug dili sa pagtagad sa mga pagtulon-an nga minugna sa mga tao (Marcus 7:7) ug sa mga kakawangan nga pagtulon-an sa mga yawa ( Jeremias 10:8-9; 1Timoteo 4:1-3).

18-ANG KAHIMTANG SA MGA DILI MAGTOTOO
Kami nagatoo nga walay tao nga mamaluwas nga wala makadungog ug mitoo sa Maayong Balita dinhi niining kinabuhia (Juan 14:6; 17:3); tungod niana among gihuptan nga ang mga dili magtotoo nga walay pagtoo sa Maayong Balita maoy mga walay paglaum ug pagahukman pinasikad sa ilang matag tanlag nga nahuptan diha sa ilang saktong kahibalo ug panimuot ingon nga tao (Roma 2:12-16), ug sa mga binuhatan nga kasupak sa pulong sa Dios (Pin.20:12).

19-ANG BULUHATON SA PAGMISYON
Kami nagatoo nga si Jesu-Cristo naghatag sa Iyang Bag-ong Tugon nga Iglesia ingon nga institusyon o dapit sa tibuok kalibutan ug dunay malahutayon nga sugo diha sa Mateo 28:19-20 aron sa pagwali, pagpamautismo, ug pagtudlo; nga ang Maayong Balita ikasangyaw ngadto sa tanang binuhat (Marcus 16:15; Lucas 24:46-48; Buhat 1:8); nga ang mga lalaki ug mga babaye sa bisan asang dapit dunay responsibilidad sa paghinulsol (Marcus 6:12; Buhat 17:30)ug pagtoo sa Maayong Balita (Marcus 1:15; Buhat 16:31), ug nga walay tao diha sa saktong pamuot nga mamaluwas kung wala kini makadungog ug makadawat sa Maayong Balita (Marcus 16:16; Juan 3:18, 36; 17:20; Roma1:16; 1Corinto 1:21; 2Corinto 4:3-4; 1Tesalonica 2:16; 2Tesalonica 1:8-9); nga ang mga dili magtotoo gawas sa Maayong Balita wala gayuy kaluwasan (Salmo 19:1-4; Roma 2:11-15); nga responsibilidad sa matag Bag-ong Testamentong Baptist nga Iglesia sa paglakaw ug pagtukod ug bag-ong mga iglesia sa samang pagtoo ug pamalaod (Buhat 13:1-4); nga katungdanan sa matag iglesia sa pagsuporta ug mga misyunaryo nga gipadala pinaagi sa oturidad sa usa ka katiguman sa tanang bautismadong magtotoo nga nahasubay sa kasulatan, kang kinsa hingkaplagan ang tanang biblikanhon hiyas sa pagkamisyunaryo (1Timoteo 3:1-7; Titu 1:6-9), kang kinsa nagsangkap sa doktrinal nga pamatuod, ug nagapahibalo kung giunsa paggamit ang pundo, ingon nga sila gimanduan sa Balaang Espiritu ug sa mayorya nga boto sa tibuok kongregasyon.

20-ANG PAGHINULSOL UG PAGTOO
Kami nagatoo nga ang paghinulsol ug pagtoo nga makaluwas maoy duha ka balaan nga mga katungdanan o responsibilidad sa tao, ug nga kini dili manag-kabulag nga Grasya, ug ang pagkabaton niini dili ingon nga natural kini nga gikan sa tawhanon nga kaugalingon paghupot kundili kini gibutang diha sa atong mga kalag pinaagi sa nagabuhi nga Espiritu sa Dios (Jeremias 24:7; Ezekiel 36:26-27; Buhat 11:16-18; 16:14; 18:27; 1Corinto 12:3, 9; Galacia 5:22; 1Juan 5:1); nga diin kita diha sa kinasul-oran nga bahin gipaila sa atong pagkamakasasala, nag-ungaw sa kakuyaw, ug pagkawalay mahimo (Salmo 116:3-5; Isaias 6:5), ug nganha sa dalan sa kaluwasan pinaagi kang Cristo (Juan 16:8; Buhat 2:37-38; 16:30-31), misunod kita ngadto sa Dios uban sa atong matuod nga paghinulsol, pagsugid sa atong sala, ug pagpangayo sa Iyang kaluoy (Lucas 18:13; 2Corinto 7:11); ug sa sama nga higayun sa kinasingkasing midawat kang Ginoong Jesu-Cristo ingon nga Propeta, Labawng Sacerdote, ug Hari, ug ang pagsalig Kaniya lamang ingon nga bugtong ug hustong Manluluwas (Buhat 3:22-23; Roma 10:9-11; 2Timoteo 1:12; Hebreohanon 7:25).

21-ANG PAGLAHUTAY SA MGA BALAAN
Kami nagatoo nga ang mga matuod nga mga magtotoo nga gibuhi o gianak diha sa Espiritu mao lamang ang makalahutay sa pag-alagad hangtud sa katapusan (Job 17:9; Mateo 10:22; Juan 8:31; Roma 8:1; Pinadayag 2:10); nga ang ilang malahutayong pagkigduol kang Cristo maoy dakung timailhan diin maoy nakapalahi kanila sa mga nanagpakaaron-ingon nanagpatoo mga kristohanon kuno ( Mateo 13:20-21; Juan 6:66-69; 13:8; 1Juan 2:19); nga adunay espesyal nga paggiya/pagbantay nga nagalantaw ibabaw kanila alang sa ilang kaayuhan (Salmo 90:1-10; 91:11-12; 121:3; Jeremias 32:40; Mateo 6:30-33; Roma 8:28); ug nga sila gitipigan sa gahum sa Dios, tungod sa Iyang Grasya pinaagi sa pagtoo ngadto sa kaluwasan (2Kings 6:16; Efeso 2-8-10; Filipos 1:6; 2:12-13; Hebreohanon 1:14; 13:5; 1Pedro 1:3-5; 1Juan 4:4; Judas 24-25).

22-ANG PAGKA-UYON SA KASUGOAN UG SA MAAYONG BALITA
Kami nagatoo nga ang kasugoan sa Dios maoy dayun ug walay pagka-usab nga balaod sa Iyang moral nga kamanduan (Salmo 19:7; Mateo 5:17; Lucas 16:17; Roma 3:20, 31; 4:1-5); nga kini balaan, matarung, ug maayo (Salmo 119; Roma 7:7, 12,14,22; Galacia 3:21); ug nga ang pagkawalay mahimo sa pagtuman niini maoy gipamatud-an sa kasulatan nga ang tao walay mahimo ug nahulog sa sala, ug dili gayud makatuman nianang maong balaod, tungod kana sa tibuk-anay nga paghigugma sa tao sa sala (Joshue 24:19; Jeremias 13:23; Mateo 19:21-26; Juan 6:44; 5:44; Roma 8:7-8; 1Juan 3:4); tungod sa paglukat kanila gikan nianang kahimtang, ug pagpabalik kanila pinaagi sa usa ka Tigpataliwala si Cristo Jesus, nga diin maoy bugtong matuod nga nagtuman sa balaan nga kasugoan, ug diin maoy dakung tumong sa Maayong Balita, pinaagi sa pagsalig kang Ginoong Jesu-Cristo tungod sa Grasya sa Dios, ug ang Grasya sa kaluwasan diin ang Maayong Balita maoy pamaagi aron makatoo (Rom.10:17) ug gimantala kini sa mga Kaiglesiahan tinukod ni Cristo sa niining Bag-ong Tugon (Mateo 16:17-18; Roma 8:2,4; 10:4; 1Corinto 12:28; 1Timoteo 1:5; Hebreohanon 8:10; 12:14; Judas 20-21).

23-ANG KAGAWASAN SA MGA KAN-ONON
Kami nagatoo nga ang pagdili sa mga mahugawng mananap, naluok nga unod ug ang dugo maoy mga pagbawal nga dili aplikado kanato karon mga magtotoo ug dili usab kalakip sa atong Kaluwasan o mamahimong hinungdan nga makaapekto sa atong relasyon sa Dios (Hebreohanon 13:9; 1Corinto 8:8), nga ang panginahanglanon sa pag-ila sa mahinlo ug mahugaw nga mga mananap maoy katuyoan lamang alang sa mga sakripisyo ug paghalad (Genesis 7:2; 8:2), kini gihatag lamang sa nasud sa Israel pinaagig kasugoan (Leviticus 11:1-2, 45), nga ang mga mahinlo nga mga mananap maoy hulagway sa kamatayon sa walay hugaw ug balaan nga Bugtong Anak sa Dios si Jesu-Cristo (Juan 1:29; 1Pedro 1:18-20; Hebreohanon 9:11-15; 10:1-2), nga tungod sa maong rason wala na kita nagahalad ug mga mahinlo nga mananap tungod sa kamatayon ni Cristo nga naghimo kanatong mga balaang sacerdote nga magahalad sa mga espirituhanong mga halad (1Pedro 2:5; Roma 12:1-2); nga ang sakripisyo nga kamatayon ni Cristo wala lamang nagtumong sa pagpasig-uli ug pagluwas sa Iyang katawhan apan kini usab naglakip sa paghiusa ug nagpasig-uli sa tanang butang nga nahugawan sa sala (Efeso 1:10; Colosas 1:20; Isaias 11:6-10), nga diin maoy hinungdan nga ang Dios wala na nagatugot sa pag-ila tali sa mahugaw ug mahinlo nga mga mananap aron kini kaonon (Marcus 7:18-19; Buhat 10:10-16; Colosas 2:14-16; Hebreohanon 9:10). Ug dungag niini ang pagdili sa naluok nga unod ug dugo nga nahasulat sa Buhat 15:20,29 maoy pagdili nga wala nagtumong sa tanang kaiglesiahan sa atong Ginoong Jesus, nga ang konsilyo sa iglesia mihukom sa pagpadala ug sulat nga diin maoy tumong ug tuyo aron lamang paghusay sa mga kaiglesiahan nga nasamok ug nangalibog mahitungod sa kasugoan ni Moses ug sirkumsisyon (Buhat 15:23-24) nga diin kita karon panahona walay labut sa maong kasamok, nga ang sulat nga gipadala ngadto sa mga kaiglesiahan sa mga magtotoong Gentil maoy intensyon aron ang mga magtotoong nga Judio nga membro sa samang iglesia dili mangasuko ug sa pagbuhat nila niani gibuhat nila ang maayo; nga kagawasan sa pagkaon sa mga kan-onon wala kini nagpugos sa mga personal nga mga pagdili ug wala usab kini nagtugot sa pagkabalbal/Canibalismo nga diin maoy buhat nga supak ug sala batok sa moral nga kasugoan sa Dios (1Corinto 10:23-33).

24-ANG IGLESIAS A BAG-ONG TUGON
Kami nagatoo nga ang Iglesia sa Bagong Tugon maoy usa ka lokal, makita, kongregasyon sa mga magtotoo nga dunay bautismo nga nahasubay sa kasulatan, (Mateo 28:19; Buhat 2:41, 47; 1Corinto 12:13; Efeso 4:5; Pinadayag 1:11), inubanan sa saad sa pagtoo ug pakigsandurot sa Maayong Balita (Buhat 2:42; 1Corinto 5:12-13; 2Corinto 8:5); nagatuman sa mga ordinansa nga gimugna ni Cristo (Mateo 26:26-30; 28:19-20) nga maoy bugtong Ulo sa iglesia (Efeso 1:20-23; 5:23); gidumalaan pinaagi sa Iyang mga sugo lamang (Galacia 6:2; Santiago 4:12); nga ang maong pundok maoy lawas ug pangasaw-onon ni Cristo sa matag lugar diin kini nahimutang (Juan 3:29; 1Corinto 12:27; 2Corinto 11:2), nga diin kini maoy angayan nga diha ang tanang mga gihimugso pag-usab kinahanglan magpasakop, tungod kay kini lamang ang matuod nga iglesia sa kalibutan karon, ug ang mga opisyalis nga gihatagan ug katungod maoy mga pastor (Efeso 4:11) ug mga diakono (Filipos 1:1; 1Timoteo 3:8-13); nga ang matag pundok anaay hingpit nga otoridad sa kinaugalingon nga pagdumala ingon nga gimanduan sa Balaan nga Espiritu, gawasnon gikan sa bisan unsang mga kamanduan sa bisan unsang mga organisasyon, convensyon, assosasyon, o mga indibidual; nga ang pagtambayayongay o cooperasyon sa matag usa ka asembliya maoy buhat nga nahasubay sa kasulatan alang sa pagpakaylap sa Maayong Balita ug sa Katudloan sa Pulong sa Dios (Buhat 15:1-31; 2Corinto 8:23-24; 11:8-9; Filipos 4:15-16), apan ang matag iglesia maoy nag-inusarang tawhanon mohukom sa pagsukod ug pamaagi sa cooperasyon; nga ang lig-on Bag-ong Tugon nga Baptist nga kaiglesiahan karon maoy nagtipig sa mga mahinungdanong pagtulon-an sa mga apostolis ug mga pamalaod; nga kining mga iglesiaha adunay kagahum sa paglahutay sa ilang kaugalingon; nga ang usa ka Bag-ong Tugon nga Baptist nga iglesia manganak ug bag-ong iglesia nga sama ug pagtoo ug pamaagi; nga diin kini gikan pa sa unang siglo ang panahon sa mga apostolis hangtud karon aduna kini kutay ug walay pagkabugto nga kagikan sa mga matuod nga iglesia hangtud sa kapanahonan umalabut (Mateo 16:18; 28: 18-20); nga kining mga iglesiaha dinhi sa kalibutan mao lamang ang naghupot sa otoridad nga gikan sa Dios (Mateo 28:18); ug busa among gitawag nga sayup sumala sa kasulatan ang; balaang panihapon nga abli o pwede sa tanan bisan dili membro (open cummunion), ang bautismo sa lain pundok, ang pagpatudlo ug pagpatindog sa mga magwawaling magtutudlo sa bakak ug sayup nga pagtulon-an (Pulpit affiliation), mission boards, pagkig-ipon ug sandurot sa ubang pundok nga nagatudlo ug sayup (ecumenicalism), unionismo, modernismo, modernong konbensyonismo ug assosyanismo, ang pagkalabaw sa usa ka iglesia ug mao lamang ang masunod kaysa uban kauban nga mga iglesia, ang pagpalabaw-labaw sa usa ka magwawali, ug uban pang mga kadautan nga miusbaw gumikan nianing mga sayup nga nahisgutan.

25-ANG KABABAENHAN SULOD SA IGLESIA
Kami nagatoo nga ang mga babaye kinahanglan makat-on sa hilum sulod sa iglesia uban sa tanan pagsubmitar/pagpasakop ug dili angayan tugotan sa pagpanudlo, pagwali, pagpangulo o ibutang sa pagdumala sa iglesia ingon nga kini tuman sa sugo sa atong Ginoo (1Corinto 14:34,37; 1Timoteo 2:10-12), nga sila kinahanglan managpamiste sa ligdong/tarung nga pamiste ug managhupot sa pagkadiosnon uban sa maayong binuhatan (1Timoteo 2:8-9; Titu 2;2); nga pinaagi sa pagbutang ug belo/pandong nagsimbolo kana sa ilang pagsubmitar/pagpasakop sa Dios, sa mga manulonda, ug sa kalalaken-an (1Corinto 11:2-10); ug pinaagi sa pagpasakop ang mga babae wala gitugotan sa trabaho sa pagkapastor ug pagkadiakono dinha sa iglesia (1Timoteo 3:1-2,12; Titu 1:6), apan wala kana nagpugong sa tulomanon sa pagwali ngadto sa mga dili pa magtotoo gawas sa iglesia (Lucas 24:46-48; Buhat 18:24-28), ug sa pagsalmot sa mga buluhaton sa kongregasyon sama sa; hiniusang pag-awit, hiniusang pag-ampo, hiniusang pagbasa sa pulong sa Dios, ug ilabi na sa pagtudlo sa mga kabataan ingon nga mga magtutudlo sa mga maayong butang (2Timoteo 1:5, Titu 2:3-4).

26-ANG ORDINANSA SA BAUTISMO
Kami nagatoo nga ang Biblikanhon nga bautismo maoy pagtuslob sa tiboouk lawas ngadto sa tubig (Mateo 3:1-7; Juan 4:1-2; Colosas 2:12) sa usa ka naghinulsol nga magtotoo (Buhat 8:36-39) pinaagi sa Balaang otoridad sa usa ka Bag-ong Tugon Baptist nga iglesia (Mateo 28:18-20) sa ngalan sa Amahan, sa Anak, ug sa Balaang Espiritu, dili ingon nga makabaton sa pagkahinlo sa sala o kaluwasan tungod kay dili tanang nabautismohan mga luwas (Galacia 2:4; Judas 4), apan aron sa pagpakita nga ang magtotoo humana naluwas diha sa iyang pagsalig ug pagtoo sa kaluwasan pinaagi sa kamatayon ug pagkabanhaw ni Jesu-Cristo (Juan 3:18,36; Roma 6:1-11) ug sa paghulagway sa pinakabalaanon simbolo sa Iyang kamatayon ngadto sa sala ug pagkabanhaw ngadto sa kinabuhi sa bag-ong pagkinabuhi diha kang Cristo; nga kini maoy gikinahanglanon nga buhaton aron mamahimong membro sa iglesia ug makasalmot sa Balaan nga Panihapon (Acts 2:41-42); nga ang mga seremonya sa pagpanghinlo sa sala maoy usa ka larawan lamang kang Cristo (Buhat 22:16 1Pedro 3:20-21); busa, ang tanan bautismo kinahanglan buhaton sa usa ka may otoridad nga matuod nga Bag-ong Tugon Baptist nga iglesia nga diin may kasaysayan ug otoridad nga walay pagkabugto balik ug gikan pa sa unang iglesia sa Jerusalem nga gitukod ni Cristo kaniadto, ug ang tanang mga pundok nga walay kutay sa kasaysayan ug otoridad balik kang Cristo lakip usab ang mga nanagpatawag nga Baptist nga iglesia nga diin dunay lahi nga bautismo maoy sayup nga mga pundok ug walay otoridad, ug wala nahisubay sa kasulatan, ug ang ilang mga pamalaod/ordinansa dili matuod ug dili balido.

27-ANG BALAANG PANIHAPON SA GINOO
Kami nagatoo nga ang Balaang Panihapon dili usa ka sakramento nga makaluwas, apan usa ka ligdong simbolo nga ordinansa nga gibutang sa iglesia pinaagi sa atong Ginoo (Mateo 26:26-30), nga diin ang mga membro sa usa ka iglesia nagatuman sa maong ordinansa/balaod (1Corinto 11:18,20,22-23), pinaagi sa paggamit ug tinapay nga walay libadura/igpapatubo ug bino sa paras, nagpakig-ambitay dili tungod sa matag-usa, apan kang Cristo (1Corinto 10:16); nga kini wala nagpakita sa ilang paghigugma sa matag-usa, apan sa paghamdom kamatayon sa Ginoong Jesus hangtud sa Iyang pagbalik (1Corinto 11:24-26); nga ang usa ka tipik sa tinapay nga gipikaspikas sa panihapon nagpunting sa panaghiusa sa lawas ni Cristo nga nagatuman niini (1Corinto 10:17), nga ang maong panagkahiusa kinahanglanon gayud alang sa usa ka balaanon ug subay sa kasulatan nga pagtuman sa maong ordinansa (1Corinto 11:18-34).

28-ANG ADLAW SA GINOO
Kami nagatoo nga ang nahaunang adlaw sa semana mao ang adlaw sa Ginoo (Buhat 20:7; 1Corinto 16:1-2; Pinadayag 1:10); nga ang iglesia sa Ginoo kaniadto uban sa mga apostolis ug mga tinun-ang kristohanon naglahi sa ilang kaugalingon nga panagkatigum sa mga Judio, tumong ug subay sa adlaw sa pagkabanhaw sa Ginoo ug pagkayab ngadto sa langit (Mateo 28:1,17; John 20:19-29; Buhat 2:1); nga ang pagsulod ni apostol Pablo sa mga sinaguga sa adlaw nga igpapahulay dili ingon nga panagkatigum sa pagsimba sa mga kristohanon apan siya misulod aron sa pagkabig ug pakiglantugi sumala sa kasulatan ngadto sa mga Judio nga mga dili magtotoo ni Jesus (Buhat 13:14-15,42-52; 16:13; 17:1-2; 18:1-4); nga ang nahaunang adlaw sa semana kinahanglan balaanon ug igahin sa rehilyoso nga mga katuyoan (Exodus 20:8; Salmo 118:24; Pinadayag 1:10); nga ang mga Kristohanon kinahanglan mohunong sa ilang mga adlaw-adlaw nga mga paghago ug mga kalibutanong paglipay-lipay (Isaias 58:13-14); nga sila kinahanglan sa pagkamainitong pag-alagad magagamit sa tanan grasya nga nadawat, sa pribado man o sa publiko, nga diin sila mamahimong mahaduol pa gayud sa Dios ug magapakita sa balaanon nga pagkinabuhi (Hebreohanon 10:25), ug sa pagpangandam sa pahulay ingon nga lain adlaw gitudlo sa Dios kang David ug Joshue nga nagapabilin alang sa katawhan sa Dios (Hebreohanon 4:3-11).

29-ANG SIBIL NGA PANGGOBERNO
Kami nagatoo nga ang sibil nga panggoberno maoy gitukod ug gihan-ay sa Dios, alang sa labawng kaayuhan ug kahusay sa tawhanong katilingban (Genesis 9:1-7; Exodus 18:23; Deuteronomio 16:18; 2Samuel 23:3; Jeremias 30:21; Roma 13:1-7); ug ang mga anaa sa pangatungdanan kinahanglan ilakip sa mga pag-ampo (1Timoteo 2:1-3), ug sa kinabubut-on pasidunggan ug tumanon tungod kay ang pagpakigbatok/pagrebelde sa panggoberno maoy pagpakigbatok sa kabubut-on sa Dios nga maoy nagtukod niana (Mateo 22:21; Titu 3:1; 1Pedro 2:13; Roma 13:1); gawas lamang kung kini nagapatuman sa mga butang nga kasupak sa Bibliya ug sa kabubut-on sa atong Ginoong Jesu-Cristo (Daniel 3:15-18; Mateo 10:28; Buhat 4:18-20; 5:29), nga mao ang Ginoo sa tanlag sa tao, ug Ginoo sa tanan mga ginoo ug Hari sa tanang mga hari sa kinatibuk-an sa yuta (Salmo 72:11; Mateo 23:10; Roma 14:4, 9-13; Pinadayag 19:16).

30-ANG DIOSNON NGA PAGKINABUHI
Kami nagatoo nga ang mga magtotoo nga matuod nahimugso pag-usab diha sa Espiritu kinahanglan maglikay sa tanang dagway sa pagkadautan (1Tesalonica 5:22; 2Timoteo 2:19); nga kinahanglan sila magkinabuhi sa kahamtong, matarung, ug diosnon dinhi niining presenting dautan nga kalibutan (Titu 2:11-13); nga kinahanglan sila manag-amping sa ilang kaugalingon sa pagpadayun sa maayong binuhatan (Titu 3:8; Efeso 2:10); nga sila magapangita sa tanang paagi sa pag-alagad kang Jesu-Cristo (2Corinto 5:15; Galacia 2:20; 1Pedro 4:2) ug sa paglakaw nga takus sa ilang hataas ug langitnong pagtawag (Efeso 4:1 Filipos 3:12-14; Hebreohanon 3:1); nga ang pagkapakyas sa pagbuhat sa pagkamatarung moresulta kana sa pagkastigo sa Dios (Hebreohanon 12:5-14); ug ang pagpadayun sa pagkinabuhi sa sala ug pagkamasinupakon nagapamatuod lamang kana nga ang maong tao wala gayud mahimugso sa Espiritu ug walay apil sa grasya sa Dios sa kaluwasan (Roma 6:11-12; 16-22; 1Tesalonica 4:7-8; 1Juan 3:1-10).

31-ANG MATARUNG UG ANG DAUTAN
Kami nagatoo nga dunay daku ug kinaugalingon nga kalainan tali sa matarung ug sa dautan (Genesis 18:23; Proverbio 12:26; Isaias 5:20; Jeremias 15:19; Malaquias 3:18; Buhat 10:34-35; Roma 6:16); nga diin ang mga matarung, pinaagi sa pagtoo sila namatarung sa ngalan ni Ginoong Jesus, ug nabalaan pinaagi sa Espiritu sa atong Dios, nga mao ang matuod nga giisip nga matarung sa panan-aw sa Dios (Proverbio 11:31; Roma 1:17; 6:18,22; 1Corinto 11:32; 2Corinto 5:21; 1Pedro 4:17-18; 1Juan 3:7); samantala ang tanang nga nagapadayun sa pagkadili-mahinulsolon ug pagkawalay-pagtoo sa panan-aw sa Dios mao ang mga dautan ug ilalum sa tunglo (Salmo 10:4; Isaias 55:6-7; Juan 3:36; Galacia 3:10; 1Juan 5:19); ug kining maong kalainan madayag sa tanang tao dinhi karon ug luyo niining kinabuhia (Proverbio 10:24; 14:32; Ecclesiastes 3:17; Lucas 12:4-5; 16:25; Juan 8:21-24; Pinadayag 22:11).

32-ANG PAGKABANHAW SA MGA PATAY
Kami nagatoo nga dunay pagkabanhaw sa mga matarung ug sa mga dautan (Daniel 12:2; Juan 5:28-29; Buhat 24:15, 26:8); nga diin dunay usa ka libo ka tuig nga gintang tali sa pagkabanhaw sa mga matarung ug pagkabanhaw sa mga dautan (Pinadayag 20:4-6) nga ang mga nangamatay diha kang Cristo maoy mabanhaw pag-una (1Corinto 15:23; 1Tesalonica 4:13-18) ug nga pagkatapus sa usa ka libo ka tuig ang mga dautan banhawon ug pagahukman sa Dios (Pinadayag 20:4-11).

33-ANG IKADUHA NGA PAG-ANHI NI CRISTO
Kami nagatoo nga ang ikaduhang pag-anhi ni Cristo mahitabo sa dili madugay ug sa kalit (Mateo 24:36,42,50), sa dili pa ang usa ka libo ka tuig nga paghari Niya dinhi sa yuta (Premillenial), diha sa lawasnon, makita, ug nga kini naglangkob sa duha ka hugna. Una sa Iyang pagpadayag diha sa kahanginan sa panganud sa dili pa mahitabo ang dakung kasakitan sa yuta (Pre-Tribulational Appearance) ug sa ikaduha ang Iyang pagtunob dinhi na sa yuta sa natapus na ang dakung kasakitan nga nahitabo sa tibuok kalibutan (Post-Tribulational Appearance); nga sa pagsakgaw(rapture) ang tanan nga nangamatay kang Cristo pagapabanhawon diha sa mahimayaon mga lawas nga walay pagkadunot ug ang tanang mga balaan nga mga buhi nga nanghabilin dinhi sa yuta paga-usbon nga sila dili na makakita ug kamatayon ug pagasakgawon na ngadto uban sa mga binanhaw uban kang Cristo diha sa kahanginan (1Tesalonica 4:13-18); nga sa Iyang pag-anhi dinhi sa yuta (Zacarias 14:1-5; Mateo 24:29-31) Siya molingkod sa Iyang trono sa himayaa sa unang higayun (Mateo 25:31; Pinadayag 3:1), magapanghukom sa tanang tao nga buhi niadtong adlawa sa kalibutan (Isaias 11:3-4); magadawat sa mga matarung ngadto sa Iyang gingharian ug magatambog sa mga dili matarung ngadto sa walay katapusan nga kalayo (Mateo 25:31-46); nga ang trono ni David mao ang Iyang trono (Isaias 9:6-7; Lucas 1:32-33); nga ang duha ka hugna sa Iyang pag-anhi managkabulag tungod sa pito sa tuig nga kasakitan nga mahitabo dinhi sa kalibutan (Daniel 9:2-27; Pinadayag 11:1-19) sa maong panghitabo ang tanang hampak sa Dios nga nahisgutan sa Pinadayag igabubo sa panahon sa paghari sa Anti-Cristo (Pinadayag 6 hangtud capitulo 19); nga sa panahon sa dakung kasakitan nga mahitabo dinhi sa kalibutan, ug ang pagpanghatag ug mga ganti (Judgment seat of Christ) ug ang kasal sa Cordero mahitabo didto sa langit (Mateo 5:11-12; 1Corinto 3:10-15; 2Corinto 5:9-10; Pinadayag 19:1-9) human niana ang Ginoong Jesu-Cristo mubalik kuyog na ang tanang mga balaan alang sa gubat sa Armageddon (Pinadayag 16:14-16; 19:11-21); nga si Satanas mabilanggo sa usa ka libo ka tuig (Pinadayag 20:1-3), ug ang mga balaan magahari uban kang Cristo sulod sa usa ka libo katuig dinhi sa kalibutan (Salmo 149:5-9; Daniel 7:18,27; 2Timoteo 2:12; Pinadayag1:5-6; 2:26-27; 5:9-10; 20:4-6).

34-ANG KATAPUSAN NGA KAHIMTANG SA TANAN
Kami nagatoo nga tapos sa usa ka libo katuig si Satanas buhian ug magapanghisalaag ug mutungas sa pagkigubat sa Balaan suidad sa Dios apan kini sila sunugon ug kalayo lakip ang tibuok kalibutan (Pinadayag 20:7-9), ug ang yuta pagalukaton gikan sa tunglo sa sala ug mamahimong sibu ug angayan nga dayun nga pinuy-anan nga dapit sa tanang katawhan sa Dios (Mateo 5:5; Roma 8:20-22; Pinadayag 21: 1-8); nga ang paagi aron mahimong angayan nga pagapuy-an sa dayun sa mga linuwas mao nga kini pagahinloan pinaagi sa kalayo (2Pedro 3:7-13); nga sa katapusan ang mga walay paghinulsol, walay pagsalig kang Cristo ug mga walay kausaban nga mga dautan igatambog, uban sa ilang mga kalag ug sa ilang mga binanhaw nga mga lawas aron pagasakiton (Mateo 10:28; Marcus 9:42-49; Juan 5:29), ngadto sa linaw nga nagdilaab nga kalayo ug asupre (Roma 2:5; Mateo 7:21-23; 25:41-46; Pinadayag 20:11-15), nga diin sila pagasilotan ug sakiton hangtud sa kahangturan sa dayun ug walay katapusan (Pinadayag 14:10-11; 20:10).